Lihkku máilmmi álgoálbmotbeivviin!
Preassadieđáhus | Almmustahtton: 09.08.2024 | Gielda- ja guovlodepartemeanta
Odne, borgemánu 9. beaivvi, čalmmustahttit mii ON riikkaidgaskasaš álgoálbmotbeaivvi. – Mun sávan sápmelaččaide, ja buot máilmmi álgoálbmogiidda, lihku beivviin. Dákkár oktasaš solidaritehtabeaivvit leat mávssolaččat, dadjá gielda- ja guovloministtar Erling Sande.
Odne lea 30 jagi áigi go álgoálbmotbeaivi ásahuvvui. Álgoálbmotbeaivi ásahuvvui 1994:s, dan oktavuođas go máilmmi álgoálbmogiid bargojoavku čoahkkanii vuosttaš geardde.
Riikkaidgaskasaš álgoálbmotbeaivi lea beaivi goas mii čájehit solidaritehta ja árvvusatnit máilmmi álgoálbmogiid ja sin vuoigatvuođaid. Maŋemus logijagiid leat máŋgga riikkas leamaš duohtavuođa- ja soabahanproseassat. Muhtin kommišuvnnat leat ásahuvvon sođiid ja riidduid olis, muhto Norgga Duohtavuođa- ja soabahankommišuvdna lea ásahuvvon guorahallat Norgga iežas politihka sápmelaččaid hárrái álgoálbmogin, ja kvenaid/norggasuopmelaččaid ja vuovdesuopmelaččaid hárrái nationála minoritehtan.
Stuoradiggi galgá gieđahallat Duohtavuođa- ja soabahankommišuvnna raportta čakčat.
– Nu go kommišuvdna ieš lea cuigen, de ii sáhte mearridit soabaheami, dasa gáibiduvvo oktasaš dáhttu olles servodagas. Ráđđehus háliida váikkuhit dán prosessii, ovttas joavkkuiguin mat leat gillán dáruiduhttinpolitihka, dadjá stáhtaráđđi.