Regjeringa la fredag fram ein proposisjon for Stortinget om å løyve for Glommens og Laagens Brukseierforening til overføring av vatn mellom Breidalsvatnet og Raudalsvatnet i Skjåk kommune i Oppland.

- Denne saka er eit særs godt døme på at ein ved å utnytte eksisterande vasskraftanlegg betre, kan få ei monaleg auke av rein og fornybar energi med små naturinngrep, seier olje- og energiminister Thorhild Widvey.

Dei to vatna har vore regulert for kraftproduksjon sidan 1940-talet. Overføringa vil gjere at ein får utnytta eksisterande reguleringar mykje betre gjennom dei kraftverka som no er under bygging i Øvre Otta.

Prosjektet vil gje om lag 125 GWh/år i ny kraftproduksjon. Dette svarer til det årlege straumforbruket til over 6000 husstandar. Overføringa vil og gje ei viss betring av flaumdempinga i Ottadalføret.

Utbygginga er i tråd med ønskjer frå kommunen, og vil gje sysselsetting og skape verdiar i regionen. Regjeringa legg og stor vekt på oppslutninga om prosjektet lokalt og på fylkesplanet.