I samband med framlegget til Stortinget om supplering av verneplan for vassdrag, legg regjeringa opp til vern av Nausta, Storelva (Skjerdalen), Nærøydalselvi, øvre del av Erdalselvi (Modlaugselvi og Horna) og Sørebøelva i Guddalsvassdraget i Sogn og Fjordane. Regjeringa har lagt vekt på dei store verdiane knytt til landskapsbilete, opplevinga av urørt natur og kulturminne.

- Eg har lagt stor vekt på å finne ein god balanse mellom lokal medverknad og omsynet til dei overordna nasjonale målsettingane. Regjeringa peiker på at lokal medverknad er viktig ved forvaltninga av dei verna vassdraga. Med ein aktiv kommunal arealplanlegging vil styresmaktene på sentralt hold ha eit godt grunnlag for å ta omsyn til det lokale engasjementet, seier olje- og energiminister Einar Steensnæs.

- Eg har lagt stor vekt på å vurdere argumenta frå dei ulike interessegruppene i samanheng. Regjeringa sitt forslag sikrar at ei rekke vassdrag i Sogn og Fjordane med store verneverdiar no vert verna mot kraftutbygging, seier statsråd Steensnæs.

Regjeringa går i proposisjonen og inn for at ein kan få konsesjonsbehandla mikro- og minikraftverk i verna vassdrag.