Regjeringa vil heve ambisjonane i energiomlegginga. For 2004 blir inntektene til Energifondet auka med 95 millionar kroner til 565 millionar kroner. Auka finansielle rammer gjev grunnlag for å sette høgare mål for energiomlegginga.

- Ein meir stabil energitilgang enn i dag krev at energiforsyninga i Noreg må gjerast mindre avhengig av vasskraft som energikjelde og elektrisitet som energibærer. Dette krev ei langsiktig omlegging av energiproduksjonen og energibruken.Energifondet og Enova er viktige bærebjelkar i den langsiktige strategien for betre forsyningstryggleik, seier olje- og energiminister Einar Steensnæs.

Den primære målsettinga med Energifondet og Enova er å utvikle marknaden for effektive energiløysningar og miljøvenlege energikjelder gjennom tildeling av tilskott. Olje- og energidepartementet vil som ansvarleg departement sørgje for at Enova har ambisiøse mål å strekke seg etter. Resultatmåla er fastsette i ei avtale mellom Enova og departementet. Enova skal medverke til miljøvenleg energiproduksjon og energisparing på til saman 10 TWh per år innan 2010. Innan den første avtaleperioden til og med 2005 skal Enova utløyse til saman 4,5 TWh per år. Måla er sette med utgangspunkt i ei finansiell ramme på 500 millionar kroner pr. år.

Departementet og Enova har starta forhandlingar om resultatmåla i avtalen. I forhandlingane vil det bli lagt vekt på Enova sine erfaringar og innsats fram til no.

I tilegge til den auka satsinga på energiomlegging gjennom Enova foreslår Regjeringa ei eiga støtteordning for investeringar i fjernvarmerøyr. Sjå eiga pressemelding om ny satsing på fjernvarme.