I samanheng med Revidert nasjonalbudsjett tilrår Regjeringa å løyve 7 millionar kroner i 2003 til oppfølginga av Gassmeldinga. Bakgrunnen for dette er dei vedtaka som Stortinget gjorde da det behandla innstillinga til meldinga. Midla skal nyttast til utreiingsarbeidet i samanheng med oppfølginga av vedtaka. Desse var knytt til:

• Utreiing av alternative løysingar for korleis gass kan føres fram til aktuelle innanlandske sluttbrukarar
• Utreiing av ulike finansieringsformar med statleg deltaking, inkludert opprettinga av eit statleg eigarselskap for investeringar i infrastruktur
• Opprettinga av eit nasjonalt hydrogenutval. Utvalet skal formulere nasjonale mål og nødvendige tiltak for å utvikle hydrogen som energiberar og virkemiddel for innanlands verdiskaping i Noreg
• Ta initiativ til eit felles pliktig grønt sertifikatmarknad – helst norsk/svensk
• Utarbeiding av ein plan for – om mogleg – ei raskare etablering av innovasjonsselskap i Grenland enn det som ein gjekk ut i frå i Gassmeldinga.

-Løyvinga legg grunnlag for ei god oppfølging i samsvar med Stortinget sine vedtak, seier olje- og energiminister Einar Steensnæs.