Utdrag frå olje- og energiminister Einar Steensnæs sin kalender for neste veke:
Statsministeren og statsrådane har normalt følgjande faste postar i sine vekeprogram: regjeringskonferanse på Statsministeren sitt kontor måndag og torsdag kl 12.15, og Statsrådets møte på Slottet fredag kl 11.00.

Måndag 22. september
Kl 10.00 har statsråden eit møte med den kinesiske viseministeren på ministers nivå, Sun Wensheng, som har ansvar for olje og gass. Formålet med møtet er å utveksle erfaringar om ressursforvaltning, utvinning og bruk av olje- og gassressursar samt miljøspørsmål knytt til denne industrien.

Tysdag 23. september
Kl 09.00 held statsråden eit innlegg på temakonferansen EnergiRike Haugalandet. Konferansen tek for seg energi som grunnlag for verdiskaping, sysselsetting og nærings- og distriktsutvikling.

Onsdag 24. september
Kl 18.00 blir Ringhorne-feltet offisielt opna av olje- og energiministeren. Opninga finn stad på Norsk Teknisk Museum på Kjelsås.

Torsdag 25. september
Kl 09.00 møter statsråden Sør-Afrika sin energiminister Phumzile Mlambo-Nguka i Olje- og energidepartementet. Dei to ministrane vil snakke om samarbeidet mellom dei to landa innafor energisektoren.

Kl 17.45 deltek statsråden på eit møte i Polyteknisk foreining si undergruppe, Norsk Energiforeining. Tema for møtet er el-avgifta, og møtet finn stad i Ingeniøranes Hus i Oslo.

Fredag 26. september
Kl 09.15 møter statsråden Bangladesh sin viseminister for energi, Mosharraf Hossain. Møtet finn stad i Olje- og energidepartementet og vil handle om samarbeidet mellom Bangladesh og Noreg innafor energisektoren.