Instruks om vektlegging av behov for pleie for herbuande

Kommunal- og regionaldepartementet viser til utlendingslova § 38 første ledd, som inneber at departementet kan instruere Utlendingsdirektoratet (UDI) om generelle lovtolkingsspørsmål og om generelle spørsmål ved skjønsutøvinga.

Departementet har merka seg at søknad om løyve til opphald i Noreg i enkelte tilfelle er grunna særleg i herbuande sitt pleiebehov i samband med sjukdom. Formålet med denne instruksen er å tryggje at UDI vurderar herbuande sitt pleiebehov som eit relevant moment, som i særlege tilfelle kan tilleggjast betydeleg vekt i vurderinga av om ein skal gi løyve i medhald av utlendingslova § 8 andre ledd.

Det er ei offentleg oppgåve å tryggje og imøtekomme pleiebehovet til den enkelte i samband med sjukdom. Når søknad om opphaldsløyve er grunna i at herbuande har behov for regulær pleie, vil søknaden dermed bli avslått med mindre dei ordinære vilkåra for arbeidsløyve i utlendingsforskrifta §§ 3 til 5 er oppfylte.

I heilt ekstraordinære sjukdomstilfelle kan det være spesielle behov hos herbuande for menneskeleg omsorg og/eller eit meir vedvarande personleg nærvær, som det offentlege i liten grad evnar eller maktar å fylle. I særlege tilfelle vil slike behov kunne oppfyllast av herbuande sine familiemedlem, eller av kjenningar som har vist seg spesielt eigna til å oppfylle behova - som ikkje fyller dei ordinære vilkåra for løyve til opphald – eller arbeid i Noreg. Slike personar kan av og til på avgjerande måte medvirke til at herbuande kan leve eit verdig og meiningsfylt liv. Slike tilfelle har eit vel så mykje humanitært som arbeidsrettsleg særpreg, og det vil kunne opplevast som klart urimeleg at løyve ikkje gis.

Det følgjer av utlendingslova § 8 andre ledd at utlending kan få løyve til opphald - eller arbeid når sterke menneskelege omsyn talar for det, eller når utlendingen er særleg knytt til riket – opphald på såkalla humanitært grunnlag. Dette sjølv om dei ordinære vilkåra i § 8 fyrste ledd ikkje er oppfylte.

Departementet ber om at UDI tryggjer at omsyn til herbuande er eit relevant moment, og i særlege tilfelle og etter ei konkret vurdering kan være eit betydeleg moment, ved praktiseringa av utlendingslova § 8 andre ledd i tilsvarande situasjonar som nemnd ovanfor.

Departementet understrekar at det alltid skal vurderast konkret om det skal løyvast opphald etter utlendingslova § 8 andre ledd. Dette medfører blant anna at UDI på vanleg måte må vurdere om det bør stillast vilkår om underhald og/eller bustad. Departementet reknar med at slike vilkår kan være særleg aktuelle å stille når ein utlending ikkje har familietilhøyring til herbuande. Dette for å motvirke at dei ordinære reglane om arbeidsløyve blir uthola og for å motvirke utnytting av utlendingen. Eventuelle løyve bør normalt kunne fornyast på vanleg måte, og gi grunnlag for løyve til busetjing.

Med helsing

Thor Arne Aass e.f.
ekspedisjonssjef

Birgitte Ege
avdelingsdirektør

Kopi:
Utlendingsnemnda
Justisdepartementet
Utanriksdepartementet
NOAS